كفاية جواز ف بيت عيلة

كفاية يا كل قرية ومدينة ف مصر كفاية خدمة ومرمطة ف عيلة صغيرة 20 سنة بتتجوز عشان تخدم وتمسك بيت مش بيتها واضافة اليه بيتها وهي اصلا امها كانت بتصحيها تفطرها الظهر 

سيبو الصغيرين يعيشو براحتهم علشان لما يكبرو ميبقوش عقارب م اللي شربوه وتفضل مأساة الحموات شغالة لحد يوم القيامة 

كفاية بقي تتجوز واحدة شهرين وتسبها وتسافر عشر شهور وهي بتخدم امك وابوك واخواتك لو لسة متجوزوش وترجع لها شهرين وتسافر تاني وهكذا وكل اجازة تخلف عيل تربي لوحدها او اهلك اللي يربوه وهي تفضل متمرمطة وجوزها متغرب عنها ياتاخدها وتسافر معاك يامتتجوزش ، وانتي ياتسافري معاه يامتتجوزيش لو حسبتي عمرك بالشكل ده هيطلعلك انك اتجوزتيه خمس سنين فعشرين سنة ده لو بينزل اجازة كل اربع شهور طيب لو مبيسافرش المفروض فالدين يرجع يشم منك اطيب ريح وبيته نظيف ووﻻده مستحميين ونايمين وانتي مستقبلاه ف شقتك بلبس كويس وابتسامة 
مش تحت بعباية وطرحة وعرق وبتحضري اكل لده وبتكنسي مكان ده وهو يطلع ياخد شاور وينام ويصحي يخرج ع الكافيه ويرجعلك بالليل انتي هلكانة ونايمة وهو كل مايجي يلاقيكي نايمة تعبانة وسبحان الله ميعرفش ايه اللى مخليكي نايمة وتعبانة 

الحماه تتخدم بس لو هى عيانه ولو ام الزوجه عيانه تبقى الام اولى وحماتك ليها بنتها وكل حاله ليها ظروفها بما يرضى الله

كفاية جواز مقرف بعيد عن الدين بقي 

متمرمطوش بناتكم لو سمحتم اشترطوا قبل الجواز بنتي فشتقها لجوزها وعيالها وبس ولو بيسافر بنتي هتسافر معاك مش هتتجوزها شهرين فالسنة والله لو ظروفك متسمحش تاخد مراتك معاك متتجوزش متسربع ع ايه

كلام مش هيعجب ناس كتير بس والله ده اسلامنا وديننا اللي مش عاجبه راجع دينك تاني وافهمه كويس 

حافظو على بناتكو واتجوزو بشروط لحياة مستقرة مش شروط شبكة ونيش وقايمة ومؤخر

وف اﻻخر بتخسرهم فقضية الخلع اللي بترفعها بتلات عيال 

ارحمو بناتكو